Xavfsizlik kamari: kimlarga taqmaslikka ruxsat beriladi?

O‘zbekiston Sog‘liqni saqlash vazirligi avtomobilda xavfsizlik kamari taqish mumkin bo‘lmagan holatlar va kasalliklar ro‘yxatini jamoatchilik muhokamasiga taqdim etdi. Hujjat hali kuchga kirmagan bo‘lsa-da, unda haydovchi yoki yo‘lovchilarga kamardan foydalanmasa ham bo'ladigan 17 ta tibbiy holat sanab o‘tilgan.

Qaysi holatlarda xavfsizlik kamari taqilmaydi?

Ro‘yxatga quyidagi holatlar kiritilgan:

• qovurğa, yelka yoki umrov suyaklarining sinishi;

• surunkali yurak yoki o‘pka kasalliklarining og‘ir bosqichlari;

• bronxial astma (IV bosqich);

• 40 dan yuqori BMI (semizlikning og‘ir shakli);

• bo‘yi 150 sm dan past bo‘lgan shaxslar;

• ko‘krak qismidagi og‘ir teri kasalliklari yoki o‘rnatilgan protezlar;

• yaqinda o‘tkazilgan ko‘krak yoki qorin sohasidagi jarrohlik amaliyotlari;

• homiladorlik holati.

Maxsus tibbiy ma’lumotnoma beriladi

Bunday holatlarda fuqarolarga elektron tibbiy ma’lumotnoma (QR-kodli) beriladi. Ma’lumotnomaning amal qilish muddati — 6 oy. Bu hujjat yo‘l-patrul xizmati xodimlariga ko‘rsatilganda, kamardan foydalanmaslik uchun asos bo‘ladi.

Muhimi: hujjat hali kuchga kirmagan

Eslatib o‘tamiz, bu ro‘yxat hozircha jamoatchilik muhokamasi bosqichida. Ya’ni, u hali rasmiy tarzda kuchga kirmagan. Muhokama yakunlangach, hujjat tasdiqlansa, shundan keyin amalda qo‘llaniladi.