Avtomobillarga “yashil”, “sariq” va “qizil” — ekostiker qanday beriladi?

Hukumat yangi nizom tasdiqladi — endi avtomobillar chiqindi gazining zararlilik darajasi bo‘yicha “toza”, “o‘rta” va “zararli” ekologik toifalarga ajratiladi. Har bir toifaga mos ravishda mashinaga yashil, sariq yoki qizil ekostiker beriladi.

Avtomobil qaysi toifaga kiradi?

Ekologik toifa mashinaning ishlab chiqaruvchi belgilagan ekologik sinfiga qarab aniqlanadi:

Benzin, CNG, LPG:

• Yevro-2 va undan yuqori — toza toifa

• Yevro-0, Yevro-1 — o‘rta toifa

Dizel:

• Yevro-4 va undan yuqori — toza toifa

• Yevro-3 — o‘rta toifa

• Yevro-0, Yevro-1, Yevro-2 — zararli toifa

Avtomatik ravishda “toza” toifa:

• Gibrid avtomobillar

• Elektromobillar

• Muqobil yonilg‘i turlarida harakatlanuvchi transport

• Ishlab chiqarilganiga 3 yildan oshmagan avtomobillar

Stiker qayerdan olinadi?

Ro‘yxatdan o‘tkazish yoki qayta rasmiylashtirish jarayonida YHXB bo‘linmalaridagi ekologik operatorlar avtomobilga uning toifasiga mos stiker beradi.

Agar kimdir stiker olishni ixtiyoriy ravishda xohlasa:

• YHX xizmatining rasmiy veb-sayti

• my.gov.uz (YaIDXP)
  orqali ariza topshirishi mumkin. Ariza mezonlarga mos bo‘lsa — stiker beriladi.

Eng qulay jihati: ekostiker muddatsiz — bir marta olinadi, tamom.